​稅務貸款大戰鬥低息

每年稅季，都係銀行稅務貸款爭客嘅時間，要容易吸引客人，低息係其中一招，所以銀行都會標榜特低實際年利率，需要借稅貸嘅朋友就要仔細比較清楚。

最低利率有條件
要申請到最低實際年利率，通常都有特定條件，例如要從事律師、醫生、會計師、公務員等指定職業，又或有本身有用銀行理財服務，例如投資戶口、有固定資產喺銀行嘅特選客戶。而借貸額通常要係$800,000或$1,000,000以上，還款期12個月，並非一般打工仔就可以輕易拎到。

舊客沿用舊利率
雖然話每年銀行都會鬥低息，不過有部分銀行會為舊客提供特別利率，或者用返上季息口，如果今季又有需要，可以先問下借開嘅銀行，睇下有冇優惠利率，同埋會唔會平過其他銀行。

建行(亞洲)最低1.18%
今季暫時以建行(亞洲)嘅1.18%為最低，除咗低息之外，佢借$200,000或以上就得，不過成功申請同提取私人貸款後3個月內要開立或升級為綜合理財、完成指定服務或設立還款戶口。而上海商業銀行亦係借$200,000就有最優惠實際年利率，但要用票買賣服務最少1次。

至於華僑永亨就為連續第三年成功申請稅貸嘅舊客提供1.25%實際年利率，南洋亦為出糧戶口客戶提供1.23%實際年利率。